| M |
ITAUN LUZEAK
(1989)
POETAK ZIRELA
(1996)
BADAEZPADA
(2001)
DOSIA
Juan Ramon Madariaga, 2003
Egun batzuetan behar bezala bizitzeko dosia
okertzen duzu eta
zubietatik tristeziak jota begiratzen diezu
ur azalean nabigatzen ari diren
gutunazal, arrain, eta amodio itzuriezinaren latexari.
Dendetan sartzen zara
damuaren perspektibaren kontrako
azken antidotoaren bila,
eta tabernetan komuneko ateetan jartzen dituzu
izenak metxeroaren keaz.
Osasun zentroetan zure izena entzun arte
itxaroten duzu,
erradiologoaren begirada transparenteak
zure hezurrak —bazenekien—
irinezkoak direla adierazteko.
Hilerrietatik abiatzen zara
bolietan dauden abizenei
aurpegiak jartzera, asmatzera,
curriculum vitae guztiak konplitzera,
gorpuen dilatazioa entzutera.
Negar batean paratzen zara gero
etxeko pasabideetan galduta,
beste gorputzik gabe,
hurrengo egunaren dosi perfektua
zein izan daitekeen hausnartu nahian.
© Juan Ramon Madariaga
| anonimoak |
| mendeak |
| 1 |
| 15 |
| 16 |
| 17 |
| 18 |
| 19 |
| 20 |
| 21 |
| poemen aurkibide alfabetikoa |